ბლოგი

გაზაფხული იდეალური დროა ახალი წიგნების დასაწყებად — მსუბუქი, ემოციური, რომანტიკული თუ ფანტასტიკური ისტორიები განსაკუთრებით კარგად ერგება ამ სეზონს. თუ ეძებ „გაზაფხულზე საკითხავ წიგნებს“, ეს სია დაგეხმარება აღმოაჩინო როგორც ბესტსელერები, ისე თანამედროვე ლიტერატურის გამორჩეული ნამუშევრები, რომლებიც შეგიძლია იპოვო ჩვენს მაღაზიაში და ვებ-გვერდზე laterna.ge

ჰარუკი მურაკამი უბრალო რომანებს არ წერს, ის მთელ სამყაროს ქმნის. სამყაროს, რომელიც თითქოს ნაცნობია, მაგრამ ამავდროულად უცნაური და არარეალური. „კაფკა პლაჟზე“ მისი ერთ-ერთი ყველაზე მომაჯადოებელი ნაწარმოებია, სადაც რეალობა იხრება, დრო იხლართება, ხოლო ოცნებასა და წარსულს შორის ზღვარი თვალის დახამხამებაში ქრება.

ოდესმე გაგჩენიათ თუ არა სურვილი თუნდაც ერთი დღით მოხვედრილიყავით წიგნის სამყაროში? ალბათ ბევრი თქვენგანის პასუხი ამ კითხვაზე იქნება დადებითი. რეი ბრედბერის შესანიშნავი ნაწარმოები - „ბაბუაწვერას ღვინო“, სწორედაც რომ ისეთი წიგნია, რომელიც უქმნის მკითხველს განცდას, რომ მას მართლაც გაუტარებია ზაფხული ამ პატარა ქალაქში, ნამდვილად შეხვედრია წიგნის კოლორიტულ პერსონაჟებს და თავად დაუგემოვნებია შესანიშნავი ბაბუაწვერას ღვინო.

ინგარის სამეფოში, სადაც შვიდმილიანი ჩექმები და უჩინმაჩინის მოსასხამები არავის უკვირს, დიდი უიღბლობაა სამშვილიან ოჯახში უფროსად დაბადება. საყოველთაოდ ცნობილია, რომ თუკი სამივენი ბედის საძიებლად გაეშურებიან, სწორედ უფროსი იგემებს მარცხს. სოფი თავიდანვე იყო შეგუებული ბედს და ცხოვრების მშვიდად გატარებას ქუდების სახელოსნოში აპირებდა. თუმცა მოულოდნელად უდაბნოს ალქაჯის წყრომა დაატყდა თავს და ბებრუხანად აქცია. ჯადოს ახსნის ერთადერთი იმედი ჯადოქარი ჰაულის მუდამ მოძრავ ციხე-კოშკში იმალება.

რამდენადაც სამწუხარო არ უნდა იყოს, ჯორჯ ორუელის ნაწარმოების - „1984“-ის წაკითხვისას ადამიანი აღმოაჩენს თუ რამდენად შეესაბამება წიგნის სიუჟეტი რეალურ სამყაროს. მკითხველის უმეტესობას უჩნდება განცდა, რომ ეს ყველაფერი  მისთვის უკვე ნაცნობია, სადღაც უნახავთ, გაუგონიათ, უსწავლიათ ისტორიის გაკვეთილებზე სკოლაში, გადაუტანიათ რეალურ ცხოვრებაში და ა.შ. მიუხედავად ნაწარმოების მიერ მრავალი ასპექტის ჰიპერბოლიზებისა, ჩვენ ვხვდებით, რომ ის დღესაც აქტუალურია მრავალი ადამიანისთვის დედამიწის გარშემო.

ჰერმან ჰესე (1877–1962) – გერმანული წარმოშობის შვეიცარიელი მწერალი და პოეტი, ნობელის ლიტერატურის პრემიის ლაურეატი (1946). ჰესეს სულიერი, ფილოსოფიური ნაწარმოებები, როგორებიცაა „ზიდჰარტა“ და „ტრამალის მგელი“, განასახიერებენ თვითძიების, შინაგანი თავისუფლებისა და ჰუმანიზმის თემებს. ის იყო საზოგადოებრივად აქტიური, ინოვაციური და წინააღმდეგობრივი ფიგურა თავისი დროის კულტურულ სცენაზე.