ხეთური სამეფო დღიურები

სადღეისოდ ცნობილი ძველაღმოსავლური „დღიურებიდან“ ყველაზე უფრო ადრენდელია ხეთური სამეფო „დღიურები“.  ხეთებმა სამეფოს დაარსებისთანავე მესოპოტამიიდან შეითვისეს დამწერლობაცა და ისტორიულ-დოკუმენტური და ლიტერატურული თხზულებების წერის კულტურაც. ამასთანავე, მათ შექმნეს საკუთარი ისტორიოგრაფიული ტრადიციებიც. თავისებურება ყველაზე მკაფიოდ სწორედ სამეფო „დღიურებში“ გამოვლინდა.

შინაარსის მიხედვით ხეთური ტექსტები შემდეგ ძირითად ჯგუფებად იყოფა:
1)    ისტორიული და პოლიტიკური შინაარსის ტექსტები;
2)    სამართლებრივი დოკუმენტები;
3)    სოციალურ-ეკონომიკური შინაარის დოკუმენტები;
4)    რელიგიური შინაარსის ტექსტები;
5)    ლიტერატურული ტექსტები, ლექსიკონები;
6)    სხვა ენებზე შედგენილი ტექსტები.
სამეფო დღიურები განეკუთვნება ისტორიულ-პოლიტიკური შინაარსის ტექსტებს. ამ ჯგუფში, მათ გარდა, შედის: სახელმწიფო ხელშეკრულებანი, დიპლომატიური კორესპონდენცია და ისტორიულ-პოლიტიკური შინაარსის სხვა ტექსტები.