ბოლშევიკის თავგადასავალი წიგნი #2 - გიორგი მირიანაშვილი

სერია „მოწმე და მონაწილე“ წარმოგიდგენთ იმ ადამიანების მოგონებებსა თუ დღიურებს, რომელნიც ცხოვრობდნენ და მუშაობდნენ საბჭოთა საქართველოში, ეუფლებოდნენ პროფესიებს, ზრდიდნენ შვილებს, მონაწილეობდნენ იმაში, რასაც საბჭოთა კავშირის ენაზე „სოციალისტური აღმშენებლობა“ ერქვა და ამავდროულად იყვნენ უშუალო მოწმეები, თუ რა ფასს იხდიდა საზოგადოება ამ „აღმშენებლობაში“. 

სერიის მეორე წიგნია გიორგი მირიანაშვილის (1897-1994) „რჩეულ მოგონებათა კრებული“, რომელსაც „ბოლშევიკის თავგადასავალი“ ვუწოდეთ (ეს წიგნი ასევე შედის სოვლაბის სერიაში „აკრძალული მეხსიერება, წიგნი 4). ავტორი აღწერს XX საუკუნის დასაწყისის ქიზიყის ყოფა-ცხოვრებას, მათ შორის ურთიერთობას ხარებასა და გოგიას ცნობილ ჯგუფთან, მოგვითხრობს როგორ ჩამოყალიბდა ბოლშევიკების მიმდევრად, რის გამოც მონაწილეობდა 1919 წლის აჯანყების მზადებაში და ციხეშიც აღმოჩნდა, წერს 1924 წლის აჯანყებისშემდგომ სისხლისღვრაზე კახეთში, საბჭოთა დაწესებულებებში მუშაობაზე, 30-იანი წლების რეპრესიებზე, მეორე მსოფლიო ომისდროინდელ ყოფასა და ომისშემდგომ დაპატიმრებაზე და ამ ყველაფერს შესაშური ლიტერატურული ალღოთი ახერხებს.

მიუხედავად იმისა, რომ გიორგი მირიანაშვილი ურყევი ბოლშევიკია, მკითხველს არ გამოეპარება მისი სურვილი, რაც შეიძლება რეალისტური სურათი დახატოს. ამის გამოცაა, ალბათ, რომ მრავალი მცდელობის მიუხედავად, საბჭოთა საქართველოში ამ მოგონებების დაბეჭდვა ვერ მოხერხდა, მეტიც, ავტორს „საბჭოთა სინამდვილის დამახინჯებაში“ სდებდნენ ბრალს.