ტყის ბაღის ზღაპრები

3 წლის წინ, მოულოდნელად, ტყის საბავშვო ბაღში დავიწყე მუშაობა აღმზრდელ-პედაგოგად ანუ ტყედაგოგად. ამ წიგნით ტყეში ნანახი ამბების გაზიარება მოვინდომე, ცოტა ფანტაზიაც დავამატე და ამ მომენტისთვის ეს გამოვიდა. ალბათ კიდევ გავაგრძელებ...

მთელი ცხოვრება მადლიერი ვიქნები ჩემი პატარა მეგობრების და ყველა იმ ადამიანის, ვისაც ტყის ბაღის სამყაროს არსებობისთვის ოდესმე ერთი აგური მაინც დაუდია. ასაწყობი ფაზლივით სულ ნაწილებად ვაგროვებდი ყველა სითბოსა და სიყვარულს, რომელიც ტყის ბაღის ,,ველური ბავშვებისგან“ იფრქვეოდა. ხშირად მოურიდებლად, აი,ასე, პირდაპირ გულით გვჩუქნიდნენ ხოლმე, თითქოს დაუფიქრებლად, მაგრამ შეიძლება უფრო გააზრებულადაც, ვიდრე გვგონია, არა უმიზეზოდ, გულწრფელი შერჩევით და მხოლოდ დამსახურებით. სწორედ ეს არის ბავშვური, მოურიდებელი სითამამე, რონელიც ნამდვილ სუპერგმირებად აქცევს მათ.