კატა, რომელმაც წიგნები გადაარჩინა

რა მოხდება, თუკი წიგნებს შენი დახმარება სჭირდებათ?

სოსუკე ნაცუკავას საერთაშორისო ბესტსელერი, რომელიც 30-ზე მეტ ენაზეა თარგმნილი და რომელსაც კრიტიკოსები ანტუან დე სენტ–ეგზიუპერის „პატარა უფლისწულს“ და ჰაიაო მიაძაკის „Spirited Away“-ს ადარებენ, გულითადი იაპონური იგავია კატებზე, წიგნებსა და იმ უხილავ მაგიაზე, რომელიც ჩვენს სულებს აერთიანებს.

თუკი გჯერა, რომ კატები საიდუმლოებებს ინახავენ, და რომ წიგნებს შეუძლიათ სამყაროს გადარჩენა – მაშინ ამ მოგზაურობას უნდა აჰყვე.

რინტარო ნაცუკისთვის – მორცხვი და საკუთარ თავში ჩაკეტილი თინეიჯერისთვის – ქალაქის განაპირას, ძველი უბნის ერთ-ერთ ქუჩაზე, მყუდრო ბუკინისტური მაღაზია არა მხოლოდ ბაბუის მემკვიდრეობა, არამედ თავშესაფარიც იყო რეალობისგან თავის დასაღწევად.

ბაბუის უეცარი გარდაცვალების შემდეგ, როცა მაღაზიის დახურვა გარდაუვალი ჩანს, მოულოდნელად იდუმალი, მწვანეთვალება კატა ჩნდება სასწრაფო მისიით.

„წიგნები უნდა გავათავისუფლოთ -, აცხადებს მოლაპარაკე კატა,  – ისინი ტყვეობაში არიან და მხოლოდ წიგნის ნამდვილ მოყვარულს შეუძლია მათი გადარჩენა“.

ასე იწყება რინტარო ნაცუკის თავბრუდამხვევი მოგზაურობა პარალელურ სამყაროებში, სადაც წიგნები იტანჯებიან – ნაწილს დავიწყება ხრავს, ზოგის შინაარსს ანაწევრებენ, ზოგსაც კი მხოლოდ ბესტსელერების ფორმულებად ატყვევებენ. ყოველი ლაბირინთი ახალ გამოცდას უმზადებს ბიჭს, მაგრამ უკანასკნელი – ყველაზე საშიში გამოწვევა – რინტარომ მარტომ უნდა გადალახოს…